Nazarbayev University (NU) жанындағы Mechanical and Aerospace Engineering (MAE) білім беру бағдарламасының студенттері мен түлектері әлемдік аэроғарыш саласының жетекші ұйымдарында кәсіби жетістіктерге қол жеткізіп келеді. Бұл табыстар бағдарламаның халықаралық деңгейдегі беделінің артып келе жатқанын және оның түлектерінің әлемдегі ең талапшыл инженерлік салалардың бірінде бәсекеге қабілетті екенін айқын көрсетеді.
MAE бағдарламасының студенті Нұрбану Жеңісова іріктеудің бірнеше кезеңінен сәтті өтіп, Ұлыбританияның Бристоль қаласындағы Airbus компаниясында толық қаржыландырылатын бір жылдық тағылымдамадан өту мүмкіндігіне ие болды. Тағылымдама 2026 жылдың жазында басталады. Осылайша, ол мұндай мүмкіндікке қол жеткізген Қазақстаннан шыққан екінші студент атанды.
Нұрбану Жеңісова өзінен бұрын осындай жетістікке жеткен MAE бағдарламасының студенті Малика Амангелдиеваның жолын жалғастырды. 2025 жылы Малика NU мен Қазақстан тарихында алғаш рет Ұлыбританиядағы Airbus компаниясында бір жылдық тағылымдамадан өткен студент атанды. Портсмут қаласындағы кеңседе ол компанияның бөлімінде жұмыс істеп, инженерлік процестерді жетілдіруге және жерсеріктерді біріктіру мен сынауға жауапты командалармен бірлескен жобаларға қатысты. Тағылымдаманы сәтті аяқтағаннан кейін Airbus компаниясы оған тұрақты қызмет ұсынды.
MAE бағдарламасы түлектерінің халықаралық жетістіктері өндірістік тәжірибемен ғана шектелмейді. NU түлегі Айя Арманова Cranfield University-де толық қаржыландырылған магистрлік бағдарламаны тәмамдағаннан кейін Rolls-Royce Defence және Cranfield University-мен бірлескен PhD бағдарламасы бойынша оқуын жалғастыруда. Ұлыбритания Үкіметінің қолдауымен жүзеге асырылып жатқан оның докторлық зерттеуі жеткізу тізбегін басқарудағы келісімшарттық үдерістерге Agile әдіснамасын қолдануға арналған. Сонымен қатар Айя жоғары білім мен академиялық мансапты таңдауға ынталандыратын тәлімгерлік бағдарламасын іске қосты.
Бұл жетістіктер NU-дың Mechanical and Aerospace Engineering бағдарламасының халықаралық деңгейде мойындалып келе жатқанын және оның студенттері мен түлектерін жетекші аэроғарыш компаниялары мен ғылыми-зерттеу ұйымдарында табысты еңбек етуге дайындайтынын көрсетеді. Әлемдік компанияларда кәсіби мүмкіндіктерге ие бола отырып, NU студенттері мен түлектері озық инженерлік шешімдер мен ғылыми зерттеулердің дамуына үлес қосып, Қазақстанның халықаралық аренадағы беделін нығайтуда.
