Nazarbayev University-дің «Электр техникасы және электроника» мамандығы бойынша түлегі Данияр Ерматов Forbes Kazakhstan басылымының «30 under 30» беделді тізіміне енді. Бұл тізім әртүрлі салалардағы жас көшбасшылар мен жаңашылдарды біріктіреді. Ол «Басқару» бағыты бойынша таңдалған екі өкілдің бірі атанды.
Қазіргі таңда Данияр Ерматов FIRST халықаралық қозғалысында бағдарламаларды іске асыру бойынша серіктес қызметін атқарады. FIRST — мектеп оқушылары мен студенттерге арналған робототехника және STEM-білім беру саласындағы әлемдегі ең ірі жаһандық бастамалардың бірі. Ол бұл ұйымға 2023 жылы Орталық Азия бойынша бағдарлама менеджері ретінде қосылып, үш жылдың ішінде серіктес деңгейіне дейін көтерілді.
Түлектің кәсіби жолы NU-да оқып жүрген кезінен басталған. Ол университет жанындағы Astana Business Campus инкубациясынан өткен Startup Home Lab стартабында жұмыс істеді. Сондай-ақ екі жыл бойы сымсыз және радиожиілікті электрондық жүйелерді әзірлеумен айналысқан зерттеу тобының құрамында болды.
Оның кәсіби қалыптасуына оқытушылық тәжірибесі де маңызды үлес қосты: Данияр алты жыл бойы мектеп оқушыларына физика мен математикадан жеке сабақ берген. Бұл тәжірибе кейін оның STEM-білім беру және жастармен жұмыс бағытындағы қызметіне негіз болды.
Данияр Ерматовты осындай жетістігімен құттықтап, алдағы кәсіби табыстарына сәттілік тілейміз!
