Nazarbayev University медицина мен денсаулық сақтау салаларының дамуына білім беруді, ғылыми зерттеулерді және клиникалық тәжірибені өзара сабақтастыра отырып үлес қосып келеді. Университеттің клиникалар, ауруханалар және Биомедициналық зерттеулер орталығын қамтитын медициналық кластері студенттерге алған білімдерін клиникалық тәжірибеде қолдануға мүмкіндік береді. Бүгінде NU түлектері дәрігер, зерттеуші, мейіргер және қоғамдық денсаулық сақтау маманы ретінде клиникаларда, ғылыми орталықтарда және денсаулық сақтау ұйымдарында еңбек етіп келеді.
Жандос Бисаринов
2022 жылы Жандос NU-да спорттық медицина және оңалту мамандығы бойынша магистратураны тәмамдады. Оған дейін Павлодар медициналық жоғары колледжінде медициналық ағылшын тілінен сабақ беріп, кейін Ана мен бала орталығының нейрохирургия бөлімінде дәрігер ассистенті болып жұмыс істеді. Бүгінде Жандос Астанадағы «Атлант» ортопедиялық және спорттық оңалту орталығында дәрігер-реабилитолог болып қызмет етеді.
Әйгерім Абдиоразова
Әйгерім Ұлыбританиядағы The University of Sheffield-те медицина ғылымдары бойынша бакалавр дәрежесін алды. Кейін NU Медицина мектебінде білімін жалғастырып, қоғамдық денсаулық сақтау саласында магистр дәрежесін иеленді. Денсаулық сақтау жүйесінде сегіз жылдан астам уақыт еңбек етіп келеді. Айгерім – «Болашақ» бағдарламасының стипендия иегері, денсаулық сақтау саласындағы халықаралық ғылыми жарияланымдардың бірлескен авторы. Кәсіби жетістіктері үшін «Денсаулық сақтау саласындағы мінсіз еңбегі үшін» грамотасымен және «Үздік маман» төсбелгісімен марапатталған.
Гүлмерей Ешенгазина
Гүлмерей медбике ісі бойынша бакалавриатты үздік аяқтап, өз тобының үздік түлегі атанды және декан тізіміне енді. Оқуымен қатар UMC Жүрек орталығының жансақтау бөлімінде жұмыс істеді. Әріптестерімен бірге жансақтау бөліміндегі медбикелердің білім деңгейін және жасанды өкпе желдетуіне байланысты пневмонияның алдын алуға арналған ғылыми негізделген ұсынымдардың сақталуын зерттеді. Бұл Қазақстанда осы тақырыпта жүргізілген алғашқы зерттеу болды. Оның нәтижелері медбике ісінде ғылыми дәлелденген тәжірибелерді кеңінен енгізуге ықпал етуі мүмкін.
Динара Мухадиева
Динара клиникалық тәжірибені қоғамдық денсаулық сақтаумен ұштастыра отырып, репродуктивті денсаулық мәселелерін зерттейді. Оның ғылыми қызығушылықтары экстракорпоралды ұрықтандыруға (ЭКҰ), бала сүю қабілетіне және ем қабылдап жүрген әйелдердің тәжірибесіне байланысты. Шетелде білім алғаннан кейін Динара Nazarbayev University-де қоғамдық денсаулық сақтау бойынша магистратураны және жаһандық денсаулық сақтау бойынша докторантураны тәмамдады. Бүгінде ол ғылыми деректерге сүйенетін әрі пациенттердің нақты тәжірибесін ескеретін бала сүю мүмкіндігін арттыруға бағытталған тәсілдерді дамытуда.
Садам Разиев
Садам Ұлыбританиядағы University of Bristol-да жасушалық және молекулалық медицина бойынша бакалавр дәрежесін алды. Кейін NU Медицина мектебін тәмамдап, 2020 жылы медицина докторы (MD) дәрежесіне ие болды. Одан соң Қазақ көз аурулары ғылыми-зерттеу институтында офтальмология бойынша резидентурадан өтті. Бүгінде Садам офтальмолог-хирург болып жұмыс істейді: көз ауруларын диагностикалайды, амбулаториялық операциялар жасайды және көру қабілетін лазерлік жолмен түзету процедураларын жүргізеді.
Досхан Қожахмет
Досхан алдымен химия бойынша бакалавр дәрежесін алып, кейін медицина докторы (MD) дәрежесін иеленді және ішкі аурулар бойынша резидентурадан өтті. Қазір ол Астанадағы №2 қалалық көпбейінді ауруханада дәрігер-терапевт болып жұмыс істейді. Ол гастроэнтерологиялық және нефрологиялық аурулардан бастап ревматологиялық және эндокриндік дерттерге дейінгі түрлі аурулары бар пациенттерді емдейді. Клиникалық жұмысын ғылыми зерттеулермен және оқытушылық қызметпен қатар алып келеді. Досхан нефрология және ішкі аурулар саласындағы ғылыми жобаларға қатысып, медициналық журналдарда мақалалар жариялайды. 2024 жылдан бастап NU Медицина мектебінде сабақ беріп келеді.
