NU-дың он студенті Бейжің мен Сиань қалаларында өткен CNPC E-Light Silk Road Energy Youth Camp халықаралық лагеріне қатысты. Бағдарламаны Бейжіңдегі Қытай мұнай университеті (China University of Petroleum-Beijing, CUPB) CNPC Central Asia Russia Company компаниясының қолдауымен ұйымдастырды.
Бағдарлама академиялық білім алуды, өнеркәсіптік кәсіпорындарға баруды және мәдени тәжірибе алмасуды ұштастырды. Қытай мұнай университетінде студенттер оқу орнының тарих музейі мен ғылыми-зерттеу зертханаларын аралап, энергетикалық қауіпсіздік және төмен көміртекті технологияларға көшу тақырыптарындағы дәрістерге қатысты.
Сондай-ақ студенттер CNPC компаниясының бас кеңсесінде, Changqing мұнай кен орнында, BYD және LONGi компанияларының өндірістік нысандарында болды. Онда олар мұнай-газ саласындағы заманауи шешімдермен, автомобиль өндірісіндегі жаңалықтармен және жаңартылатын энергия технологияларымен танысты. Baidu компаниясына, Шицзиншань ауданындағы гуманоид роботтарды оқыту орталығына және зияткерлік газ станциясына барған кезде студенттер жасанды интеллект, автономды көлік жүргізу, робототехника және цифрлық технологиялардың іс жүзінде қалай қолданылатынын көрді.
Ғылыми-зерттеу зертханалары мен өндірістік нысандарға бару студенттердің кәсіби білімін кеңейтіп, ғылыми әзірлемелердің өнеркәсіпте қалай қолданысқа енгізілетінін тереңірек түсінуіне мүмкіндік берді. Сонымен қатар олар түрлі салалардағы болашақ кәсіби даму мүмкіндіктерімен танысты. Сиань музейі мен басқа да тарихи орындарды қамтыған мәдени бағдарлама студенттердің Қытай тарихы мен мәдени мұрасы туралы танымын толықтырды.
Студенттердің лагерьге қатысуы NU мен CNPC арасындағы ынтымақтастықты одан әрі дамытуға үлес қосты. Академиялық алмасумен қатар, тараптар тағылымдамадан өту, түлектерді жұмысқа орналастыру, ғылыми зерттеулер жүргізу және өнеркәсіптік кәсіпорындармен байланысты нығайту бағыттарындағы ынтымақтастық мүмкіндіктерін қарастыруда.
