Nazarbayev University Graduate School of Business (NUGSB) Kellogg-HKUST Executive MBA халықаралық бағдарламасының 50 қатысушысын қабылдады. 14–18 қыркүйек аралығында әлемнің түрлі елдерінен келген бизнес өкілдері мен компания басшылары NUGSB-де оқу модуліне қатысып, Қазақстанның экономикасы, инвестициялық ахуалы және жетекші компанияларымен танысты.
Kellogg-HKUST Executive MBA — Northwestern University жанындағы Kellogg School of Management пен HKUST Business School бірлесіп жүзеге асыратын бағдарлама. Оған әлемнің әр түкпірінен бизнес иелері, компаниялардың бас директорлары, директорлар кеңесінің мүшелері мен жоғары буын басшылары қатысады. Бағдарламаға банк және қаржы секторы, инвестиция, активтерді басқару, бөлшек сауда, консалтинг және басқа да салалардың өкілдері қатысады. Financial Times басылымының Executive MBA жаһандық рейтингінде бағдарлама 12 рет бірінші орын алған.
Қазақстандағы оқу бағдарламасы NUGSB-дегі сабақтарды елдің жетекші компаниялары мен ұйымдарына жасалған сапарлармен ұштастырды. Қатысушылар Baiterek, Астана халықаралық қаржы орталығы (AIFC), Astana Hub, ERG, Halyk Bank және BI Group ұйымдарына барып, Қазақстан экономикасының ерекшеліктері, қаржы және технология секторларының дамуы, сондай-ақ елдің іскерлік ортасы туралы кеңірек мағлұмат алды.
Бағдарламаның маңызды бөліктерінің бірі — кәсіпкерлік, қаржы, технология, инвестиция және логистика салаларында қызмет ететін NUGSB түлектерінің қатысуымен өткен панельдік сессия. Kellogg-HKUST Executive MBA қатысушыларымен бірге олар инвестициялар мен венчурлік капитал, жасанды интеллект және цифрлық трансформация, логистика, сондай-ақ Қытай және Гонконгпен сауда-экономикалық байланыстар тақырыптарын талқылады. Кездесу кәсіби тәжірибе алмасып, жаңа іскерлік байланыстар орнатуға мүмкіндік берді.
Kellogg-HKUST Executive MBA сияқты беделді халықаралық бағдарламалардың оқу модульдерін өткізу арқылы NUGSB халықаралық кәсіби және академиялық байланыстарын нығайтып, жаһандық бизнес қауымдастығына Қазақстанның экономикалық және іскерлік әлеуетін жақынырақ таныстырады.
