Мемлекет басшысы балаларға мектептегі оқуын жалғастыра отырып, емді үзіліссіз алуға мүмкіндік беретін Smart Classrooms ауруханалық қызметімен танысты. Балалар мектеп бағдарламасына сәйкес математика, тарих және басқа да пәндерді оқи алады. Сонымен қатар, кішкентай ем алушыларға музыкалық терапия сеанстары, аудиоертегілер, түрлі шығармашылық ойындар, шахмат ұсынылады.
Президент Тоқаев еліміздің басқа өңірлерінен Астанаға емделуге келген кейбір балалармен және олардың ата-аналарымен кездесті. Кездесу барысында Қасым-Жомарт Тоқаев 2022 жылдың неліктен Балалар жылы болып жарияланғандығы, осыған байланысты үкімет білім беру, балалар денсаулығын сақтау және жасөспірімдер спортындағы саясатты жетілдіруге күш салғандығы туралы айтып өтті.
Президент Тоқаев кішкентай науқастардың тезірек сауығып кетуін тілеп, Жаңа жылмен құттықтап, оларға сыйлықтар табыс етті. Сондай-ақ ол ауруханаға жаңа реанимобиль сыйлады.
Ұлттық ғылыми Ана мен бала денсаулығы орталығында бүгінде 351 жас пациент ем алуда. 2022 жылы мұнда 18 мыңға жуық бала емделді.
Дереккөз: akorda.kz
