Питер Норвиг, Джон Хопкрофт және Меруан Дебба NU-дың 400 студентімен тәжірибесімен бөлісті
1 қазанда Nazarbayev University Ақылды жүйелер және жасанды интеллект институты (ISSAI) әлемге танымал жасанды интеллект саласының пионерлерін бір алаңға тоғыстырған AI Horizons: A Conversation with Global Leaders атты ауқымды іс-шара өткізді.
Пікірталасқа Stanford University зерттеушісі және Google-дың ғылыми зерттеулер жөніндегі директоры профессор Питер Норвиг; Тьюринг сыйлығының лауреаты, есептеу теориясы бойынша жетекші ғалымдардың бірі профессор Джон Хопкрофт; сондай-ақ King Abdullah University of Science and Technology (Сауд Арабиясы) профессоры Меруан Дебба қатысты. Кездесудің модераторы ISSAI-дың негізін қалаушы әрі директоры профессор Хусейн Атакан Варол болды. Залға NU-дың студенттері, оқытушылары мен жасанды интеллектпен айналысатын зерттеушілері жиналды.
Ғалымдардың Қазақстанға сапары Президент тапсырмасымен құрылған Жасанды интеллектті дамыту жөніндегі Ұлттық кеңес бастамалары аясында жүзеге асты. Іс-шара ҚР Жасанды интеллект және цифрлық даму министрлігінің қолдауымен өтті.
Талқылау барысында жасанды интеллекттегі зерттеулердің болашағы, білім беру жүйесінің дамуы және жаһандық бәсекеге қабілеттілік мәселелері қаралды. Профессор Хопкрофт дәстүрлі информатиканың тереңдетілген оқыту дәуірінде де өзектілігін жоғалтпайтынын атап өтіп, мансап жолында жеке қызығушылықты басты орынға қоюдың маңызын жеткізді: «Өмір бір-ақ рет беріледі. Оны босқа өткізбеу керек. Шын ұнататын ісіңізді табыңыз да, соның айналасында мансап құрыңыз».
Профессор Норвиг күрделене түскен жасанды интеллект жүйелерін түсіндіру мәселесін қозғап, сенімнің маңызын атап өтті: «Түсіндіру – бұл әңгіме. Ал бізге әңгіме тыңдау ұнайды. Бірақ кейде ол адастыруы мүмкін. Шынайы сенімге қол жеткізу үшін түрлі тексеру құралдары мен тепе-теңдікті сақтау қажет».
Ғалымдар Қазақстанның әлемдік AI экожүйесіндегі рөліне де тоқталды. Хопкрофт ауыл шаруашылығы мен білім беру саласындағы мүмкіндіктерді ерекше атап өтті. Норвиг жас инноваторларға: «Адамдарға шынымен қажет нәрсені жасаңыздар» деп кеңес берді. Дебба студенттерді жетекші ғалымдармен байланыс орнатуға шақырды: «Өздеріңізді шабыттандыратын зерттеушілерге жазыңыздар. Олардың еңбектерін оқып шыққаныңызды көрсетіп, мәселені айқындап, өз үлесіңізді қалай қоса алатыныңызды ұсыныңыздар».
Кездесу NU студенттері мен спикерлер арасындағы еркін пікір алмасумен аяқталып, жасанды интеллект саласында жаңа буын зерттеушілері мен мамандарын ізденіске, шығармашылыққа және мақсатқа жетуге ынталандырды.
