150 жылдан астам тарихы бар Wabtec халықаралық компаниясының атқарушы вице-президенті әрі технологиялар жөніндегі бас директоры Эрик Гебхардт бастаған делегация NU-ға келді. Сапар барысында тараптар бірлескен ғылыми және инженерлік жобаларды жүзеге асыру, цифрлық технологиялар саласындағы ынтымақтастықты кеңейту, сондай-ақ университет студенттері мен түлектері үшін жаңа мүмкіндіктер қалыптастыру перспективаларын талқылады.
Wabtec – теміржол көлігіне арналған жабдықтар, цифрлық шешімдер мен технологияларды ұсынатын әлемдегі жетекші компаниялардың бірі. Компания 50-ден астам елде жұмыс істейді және әлем бойынша 30 мыңнан астам адамды жұмыспен қамтып отыр. Қазақстанда Wabtec локомотив жасау саласын дамытып, заманауи инженерлік және цифрлық шешімдерді енгізіп келеді.
Сапар аясында компания өкілдері NU-дың ғылыми-зерттеу инфрақұрылымымен танысып, жаңартылатын энергия, жоғары кернеулі техника, өлшеу жүйелері және телекоммуникациялар зертханаларын аралады. Сондай-ақ қонақтарға озық материалдар, 3D-басып шығару, сейсмикалық сынақтар, робототехника және мехатроника бағыттарындағы зерттеулер мен әзірлемелер таныстырылды.
NU провосты профессор Рехан Садик, студенттік мәселелер және халықаралық ынтымақтастық жөніндегі вице-президент Қадиша Даирова, Инженерия мектебі, Компьютерлік ғылымдар және жасанды интеллект мектебі мен Мансап және кәсіптік бағдарлау орталығының өкілдерімен өткен кездесуде бірлескен ғылыми және инженерлік жобаларды іске асыру мүмкіндіктері талқыланды. Кездесуде жасанды интеллект, автоматтандыру, цифрлық диагностика және зияткерлік көлік жүйелеріне, сондай-ақ технологиялық шешімдерді сынақтан өткізу мен әзірлеу үшін NU зертханалық инфрақұрылымын пайдалану мүмкіндіктеріне ерекше назар аударылды.
Кездесудің тағы бір маңызды бағыты – мамандар даярлау саласындағы ынтымақтастықты дамыту. Тараптар студенттерге арналған тағылымдамалар, бірлескен жобалар, тәлімгерлік және түлектерді жұмысқа орналастыру мүмкіндіктерін талқылады.
NU мен Wabtec арасындағы серіктестік 2022 жылдан бері дамып келеді. Компания жыл сайын сегізге дейін студентті тағылымдамадан өткізіп, соңғы төрт жыл бойы Mechaton Case Championship инженерлік байқауын қолдап келеді. Сонымен қатар Wabtec университеттің мансаптық іс-шараларына қатысып, қонақ дәрістерін өткізеді. Қазіргі таңда Қазақстандағы Wabtec қызметкерлерінің қатарында инженерлік және басқару бағыттарында еңбек етіп жүрген NU түлектері де бар.
Кездесу қорытындысы бойынша тараптар серіктестікті одан әрі дамытуға мүдделі екенін растады. Алдағы уақытта NU-дың ғылыми әлеуетін Wabtec компаниясының технологиялық сараптамасы мен өндірістік мүмкіндіктерімен ұштастыратын нақты бірлескен бастамаларды талқылау жалғасады.
