Назарда – тиімді басқару
Nazarbayev University жанындағы Қоғамдық саясат жоғары мектебі (Graduate School of Public Policy, GSPP) өзінің тоғызыншы халықаралық конференциясын өткізіп, ғалымдар, практиктер мен мемлекеттік сектор өкілдерін «Саясатты қалыптастырудың күрделілігін еңсеру: сын-қатерлер мен мүмкіндіктер» тақырыбы аясында біріктірді.
Іс-шара туралы пікір білдірген Қоғамдық саясат жоғары мектебінің қауымдастырылған профессоры Владимир Козлов атап өтті:
«Бұл тек теориялық мемлекеттік саясат емес. Бұл — сараптамалық тәжірибе, саясат нәтижелерін бағалау және шешім қабылдауға негіз болатын деректерді талдау. Жалпы алғанда, конференция тақырыптардың әртүрлілігі мен пәнаралық көзқарасы тұрғысынан өте сәтті өтті».
Биылғы конференция сандық технологиялар мен жасанды интеллект, азаматтық қатысу, тұрақты даму, мемлекеттік секторды реформалау және әлеуметтік әл-ауқат сияқты өзекті мәселелер бойынша терең талқылауларды қамтыды. Қатысушылар саясатты әзірлеу үдерістерін практикалық тұрғыдан зерттеуге мүмкіндік беретін екі интерактивті воркшопқа да қатысты.
Іс-шараға 60 спикер, оның ішінде бірлескен авторлар қатысты. Олардың қатарында Жапония, Түркия, Ресей, Германия және басқа да елдердің ғалымдары мен сарапшылары бар. Конференция мемлекеттік саясат пен басқару саласында идеялар алмасуға және ынтымақтастық орнатуға арналған маңызды халықаралық алаңға айналды.
Сессиялар барысында салық реформалары, мемлекеттік басқарудың тиімділігі, сыбайлас жемқорлықтың алдын алу және мемлекеттік аппаратты оңтайландыру сияқты нақты саясаттық мәселелер қарастырылды. Сарапшылар саясат шешімдерінің себептерін, олардың нәтижелерін және табысты басқару үлгілерін қалыптастыруға ықпал ететін тәсілдерді талдады. Талқылаулардың мақсаты — тек не жұмыс істейді деген сұраққа емес, неліктен жұмыс істейді дегенге де жауап табу, сондай-ақ түрлі елдердің тәжірибелерінен пайдалы сабақ алу болды.
Жыл сайынғы халықаралық конференция Қоғамдық саясат жоғары мектебі үшін дәлелге негізделген мемлекеттік саясатты дамытуға арналған өңірлік және халықаралық диалог алаңы болып табылады және ол NU-дің Орталық Азиядағы мемлекеттік саясат саласындағы зерттеу мен білім беруді ілгерілетуге деген ұмтылысын көрсетеді.
