Азия университеттері альянсы (Asian Universities Alliance, AUA) президенттер форумының пленарлық сессиясында университеттер мен индустрия арасындағы өзара іс-қимыл және еңбек нарығы тез өзгеріп жатқан жағдайда түлектерді даярлау мәселелері қаралды. Іс-шара 2 маусым күні Nazarbayev University-де өтті.
Азияның жетекші жоғары оқу орындарының басшылары бизнеспен әріптестік тәжірибелерімен бөлісіп, жұмыс берушілердің білім беру бағдарламаларын әзірлеуге қатысуы, сондай-ақ студенттерді тәжірибелік даярлау мен академиялық құндылықтар арасындағы тепе-теңдікті сақтау мәселелерін талқылады. Пікірталастың модераторы ретінде Біріккен Араб Әмірліктері университетінің Бизнес және экономика колледжінің студенттік істер жөніндегі декан орынбасары доктор Омар Әл-Бастаки сөз сөйледі.
Цинхуа университеті кеңесі төрағасының орынбасары профессор Бин Ян өнеркәсіптің нақты мәселелерін шешуге бағытталған инженерлік докторантураның жаңа үлгісі туралы баяндады. Бағдарлама стартап жетекшілеріне, аға инженерлерге және компаниялардың ғылыми қызметкерлеріне арналған. Дәстүрлі диссертацияның орнына қатысушылар өз жұмысының нақты инновациялық нәтижелерін көрсетуі тиіс. Профессордың айтуынша, индустриямен тиімді әріптестік студенттерді іріктеу кезеңінен басталуы қажет.
«Егер компаниялар ең әлеуетті үміткерлерді таңдауға қатысып, бағдарламаның алғашқы кезеңінен бастап өздерін оның бір бөлігі ретінде сезінсе, олар мамандарды даярлауға да, түлектерді жұмысқа орналастыруға да әлдеқайда белсенді араласады», — деді ол.
Nazarbayev University провосы, профессор Рехан Садик университет пен бизнестің әріптестігі әртүрлі деңгейде жүзеге асуы мүмкін екенін атап өтті — қонақ дәрістерден бастап бірлескен зерттеулер мен инновациялық экожүйелер құруға дейін.
«Ең жетілген модель — толыққанды инновациялық экожүйе қалыптастыру. Мұндай тәжірибенің сәтті үлгілері Қытайда бар, онда университеттердің айналасында ұлттық даму басымдықтарына сай жұмыс істейтін ғылыми парктер мен зерттеу кластерлері қалыптасқан. Бұл жүйеде университет, бизнес және мемлекет үздіксіз диалогта болып, жаңа білім, технология және мамандар даярлауға арналған мүмкіндіктерді бірге жасайды», — деді ол.
Сеул ұлттық университеті вице-президентінің жаһандық байланыстар жөніндегі орынбасары профессор Буюль Ким университеттердің жаңа экономикалық сұраныстарға бейімделуі туралы айтты. Оның сөзінше, екі жыл бұрын университет цифрлық денсаулық сақтау, жартылай өткізгіштер технологиясы және деректер ғылымы бағыттарына негізделген Пәнаралық инновациялар мектебін ашқан.
Сонымен қатар профессор Ким академиялық тәуелсіздікті сақтаудың маңызын ерекше атап өтті. «Біз индустриямен жаңа форматтағы әріптестікке ашықпыз, бірақ сонымен бірге университеттік білім берудің іргелі қағидаларын сақтауға мәжбүрміз», — деді ол.
Гонконг ғылым және технология университетінің оқу және оқыту жөніндегі ассоциирленген провосты профессор Джимми Фанг студенттердің көшбасшылық қабілеттері мен кәсіпкерлік ойлауын дамытуға назар аударды.
«Университеттер жастардың көшбасшылық дағдыларын дамытып, қоғам игілігі үшін әрекет ете алатын және өзгелерге жол көрсете білетін қауымдастық қалыптастыруы керек», — деді ол.
Форумды қорытындылаған Nazarbayev University Жоғары білім беру мектебінің деканы, академиялық жоспарлау және бюджет жөніндегі вице-проректор доктор Аида Сағынтаева Азия университеттері бүгінде шетелдік тәжірибені жай ғана көшірмей, өздерінің даму модельдерін қалыптастырып жатқанын атап өтті.
«Бүкіл өңір бойынша университеттер басқару, әріптестік және технология енгізу салаларында жаңа модельдерді сынақтан өткізіп жатыр. Бұл жоғары білімнің болашағы көптеген елдер мен университеттердің бірлескен еңбегі арқылы қалыптасатынын көрсетеді», — деді ол.
Осылайша форум университеттердің әлеммен бірге өзгеруге қаншалықты дайын екенін және өз трансформациясына өзі жауап бере алатынын талқылайтын маңызды халықаралық диалогтың бір бөлігіне айналды.
Asian Universities Alliance туралы
Asian Universities Alliance 2017 жылы Бейжіңдегі Tsinghua University базасында құрылып, Азияның жетекші 15 университетін біріктірді. Times Higher Education World University Rankings 2026 рейтингінде 401–500 аралығында орналасқан әрі Орталық Азия мен Кавказ өңіріндегі үздік университет ретінде танылған Nazarbayev University — альянстың негізін қалаушы мүшелерінің бірі.
