Осыдан 20 жыл бұрын мемлекеттік қызметтердің сапасын арттыру және сыбайлас жемқорлық деңгейін төмендету мақсатында алғашқы «бір терезе» қағидаты бойынша қызмет көрсететін орталықтар ашылған еді. Сол кезден халыққа қызмет көрсету орталықтары (ХҚКО) пилоттық жобадан бастап кең ауқымды фронт-офистер желісіне дейінгі үлкен трансформациялық жолдан өтіп, бүгінде қазақстандықтардың күнделікті өмірінің ажырамас бөлігіне айналды.
2025 жылғы 12 қарашада Nazarbayev University жанындағы Ұлттық талдамалық орталықта (ҰТО) ХҚКО-ларды дамыту мәселесіне арналған дөңгелек үстел өтті. Іс-шараға ҚР Президенті Әкімшілігі, Парламент Сенаты, Мемлекеттік қызметтер комитеті, Мемлекеттік қызмет істері агенттігі, «Азаматтарға арналған үкімет» мемлекеттік корпорациясы» КЕАҚ және академиялық орта өкілдері қатысты.
«Бүгінгі дөңгелек үстел – ҰТО ұйымдастырып отырған іс-шаралар сериясының бірі. Біз мұнда мемлекеттік органдар мен академиялық қауымдастықтың өкілдерін пікір алмасып, сындарлы диалог құруға шақырамыз», – деді ҰТО басқарма төрағасы Расул Рысмамбетов өз сөзінде. Ол сондай-ақ ХҚКО-лардың мемлекеттік басқару жүйесі мен қоғам арасындағы маңызды байланыстырушы буын болып қала беретінін атап өтті.
Қазақстан Республикасы Мемлекеттік қызмет істері агенттігінің басқарма басшысы Айбол Қозбагаров пен Шығыс Қазақстан жастар ақпараттық-талдау агенттігінің жетекшісі Людмила Захарова ХҚКО тарапынан мемлекеттік қызметтердің сапасына жүргізілген қоғамдық мониторингтің нәтижелерін таныстырды. Ұлттық талдамалық орталық сарапшылары Салтанат Джаненова мен Сауле Газизова «Мемлекеттік қызметтердің цифрландыру жағдайында ХҚКО-ларға сұраныс бар ма?» тақырыбындағы зерттеу нәтижелерін таныстырды. Зерттеу NU Әлеуметтік даму қорының қолдауымен жүргізіліп, азаматтар мен ХҚКО қызметкерлерінің «бір терезе» қағидаты бойынша жұмыс істейтін орталықтар туралы пікірлерін талдауға негізделген.
Дөңгелек үстелде ҰТО сарапшыларының ХҚКО-ларды жабудан гөр, оларды цифрлық қолдау орталықтарына айналдыру жөніндегі ұсыныстары талқыланды. Мұндай орталықтар күрделі мемлекеттік қызметтер мен өмірлік жағдайлар бойынша кеңес берумен қатар, әлеуметтік осал топтардың цифрлық сауаттылығын арттыруды қамтуы мүмкін. Сондай-ақ сарапшылар офлайн-қызметтердің негізгі пайдаланушылары – әлеуметтік осал топтарға арналған ұлттық оқыту бағдарламасын іске қосуды және ХҚКО қызметкерлерінің әлеуметтік әрі құқықтық қорғалу деңгейін арттыруды ұсынды.
Қорытындысында қатысушылар электрондық сервистер мен платформалардың дамуына қарамастан, ХҚКО-лардың мемлекеттік қызметтердің қолжетімділігі мен сапасын қамтамасыз етудегі рөлі — әсіресе егде жастағы азаматтар мен әлеуметтік тұрғыдан әлсіз топтар үшін — әлі де маңызды әрі шешуші мәнге ие деген пікірге келді.
