Ғылым қызметкерлері күні қарсаңында Қазақстан Республикасының Президенті Қасым-Жомарт Тоқаев ғылым саласында елеулі жетістіктерге жетіп, жоғары білімнің дамуына қомақты үлес қосқан ғалымдарды марапаттады, деп хабарлайды Ақорда баспасөз қызметі.
Марапатталғандардың қатарында Nazarbayev University (NU) Инженерия және цифрлық ғылымдар мектебінің (SEDS) постдокторанты, PhD дәрежесінің иегері Әсия Ермұхамбетова бар. Ол «Ерен еңбегі үшін» мемлекеттік марапатқа ие болды. Бұл марапат оның отандық ғылымды дамытуға, зерттеу әлеуетін арттыруға және жаңа буын ғалымдарды даярлауға қосқан үлесін бағалайды.
«Бұл мен үшін тек үлкен құрмет қана емес, сонымен қатар үлкен жауапкершілік. Мен оны отандық ғылымды дамытуға, жаңа буын зерттеушілерді даярлауға және қоғам мен экономиканың нақты сұраныстарына жауап беретін ғылыми шешімдер іздеуге бағытталған ортақ еңбегімізге деген сенімнің белгісі ретінде қабылдаймын», — деді ол.
Әсия Ермұхамбетова Жас зерттеушілер альянсы сияқты бастамалардың маңызын атап өтіп, олардың жас ғалымдарды қолдауда және талантты жастардың ғылымды мүмкіндік, даму және елдің болашағына әсер ететін сала ретінде көруіне жағдай жасауда маңызды рөл атқаратынын айтты.
Ғылым қызметкерлері күнімен әріптестерін құттықтай отырып, д-р Ермұхамбетова Қазақстан ғалымдарына жаңа жетістіктер, батыл идеялар, халықаралық деңгейдегі жобалар және шәкірттерінің биік ғылыми белестерді бағындыруын тіледі.
NU сонымен қатар осы жоғары мемлекеттік наградаға ие болған өз түлектерін құттықтайды:
- Бейбіт Болатғазыұлы Әбдікенов — «Astana IT University» ЖШС директоры
- Жандос Төрегұлұлы Тауанов — ҚР Ғылым және жоғары білім министрлігіне қарасты әл-Фараби атындағы Қазақ ұлттық университеті Жастар кеңесінің төрағасы.
