Nazarbayev University-дің бакалавриат бағдарламаларының үш студенті Азияның жетекші жоғары оқу орындарының бірі — Tsinghua University-де өткен екі апталық бағдарламаға қатысуға іріктелді.
6–20 қазан аралығында Жаратылыстану, әлеуметтік және гуманитарлық ғылымдар мектебінің екі студенті мен Инженерия және цифрлық ғылымдар мектебінің бір студенті Asian Universities Alliance ұйымының серіктестігі аясында жүзеге асқан AUA Asia Deep Dive Program бағдарламасына қатысып, “Exploring China: Sustainability, Innovation, and History” тақырыбында білім алды. NU — бұл альянстың тең құрылтайшыларының бірі.
Бағдарлама барысында студенттер жетекші ғалымдар мен сарапшылардың дәрістеріне, интерактивті семинарларға және мәдени іс-шараларға қатысты. Академиялық сессияларда экология, биофармацевтика, мұхит инженериясы, урбанистика және технологиялық инновациялар тақырыптары қамтылды. Сондай-ақ қатысушылар Қытайдың бай мәдени мұрасымен танысып, Шэньчжэнь, Гуанчжоу және Бейжің сияқты ірі қалаларға саяхат жасады.
“Electrical and Computer Engineering” бағдарламасының 3-курс студенті Диас Пернехан Tsinghua University-дің мемлекеттік жобалармен тығыз байланысына ерекше әсерленгенін айтты: «Олардың мұхитты тазарту бастамалары, толқын энергиясын өндіру және спутниктерді басқару жобалары ғылыми зерттеулер мен олардың практикалық қолданылуы арасындағы берік байланысты көрсетеді», — деді ол.
“Sociology” бағдарламасының 3-курс студенті Багдан Исаков өз әсерімен бөлісті: «Біз Оңтүстік Қытай теңізінің тарихы, су инженериясы, сәулет және басқа да тақырыптар бойынша мазмұнды дәрістерге қатыстық. Сабақтардан тыс уақытта қаланы аралап, антиквариат базарларын, мұражайлар мен мәдени кафелерді тамашаладық».
“Political Science and International Relations” бағдарламасының 3-курс студенті Лашын Зейін де өз пікірімен бөлісті: «Біз шынайы достар таптық және алдағы уақытта бірге студенттік форум ұйымдастыруды жоспарлап отырмыз. NU атынан қатысу мүмкіндігі үшін ризамын, алған білімімді студенттік жобаларды қолдауға және жаңа серіктестіктерді дамытуға пайдаланғым келеді».
Бағдарлама БҰҰ Қауіпсіздік кеңесінің отырысын модельдеу (Model UN) конференциясымен аяқталды. Онда NU студенттері «Жастардың жаһандық қауіпсіздікті қамтамасыз етуге қатысуын ілгерілету» тақырыбындағы симуляцияда Қазақстанды таныстырды.
