29 қаңтарда Nazarbayev University (NU) энергетика, мұнай-газ және химиялық өнеркәсіп объектілерін жобалау және салумен айналысатын ірі италиялық Maire инженерлік-технологиялық компаниясы делегациясын қабылдады. Кездесу барысында білім беру, ғылыми зерттеулер, адам капиталы мен инновацияларды дамыту саласында ынтымақтастықты кеңейтуге бағытталған Өзара түсіністік туралы меморандумға қол қойылды.
Меморандумға NU президенті профессор Вакар Ахмад пен Maire компаниясының Орталық Азиядағы өңірлік вице-президенті Никколо Хайльперн қол қойды. Құжат тараптар арасындағы жан-жақты өзара әрекеттесу аясын айқындайды. Maire сарапшылары студенттерге дәрістер өткізіп, олар офлайн және онлайн форматта өз тәжірибелерімен бөлеседі. Сондай-ақ компания Қазақстандағы өндіріс нысандарында тағылымдама мен практика мүмкіндіктерін ұсынып, студенттерге құнды дағдылар меңгеруге жағдай жасайды.
«Біздің университет сұранысқа ие дағдылары мен білімі бар жоғары білікті, ынталы және талантты мамандарды дайындайды, олар халықаралық деңгейде мойындалуда. Өңірдің жетекші компаниялары, соның ішінде Maire-мен ынтымақтастық орнатып, олардың серіктестікке деген адалдығын жоғары бағалаймыз. Студенттеріміз бен индустрия арасындағы байланысты нығайту және білімнің практикалық қолданылу мүмкіндіктерін қамтамасыз ету — университеттің басты міндеттерінің бірі. Біз ынтымақтастықтың кең спектрін қарастырып, бұл серіктестік екіжақты тиімді болады деп сенеміз», — деді Вакар Ахмад.
Меморандум академиялық озық тәжірибелерге қатысты бастамаларды да қарастырады, оның ішінде үздік студенттер мен оқытушыларға арналған демеушілік қолдау, сыйлықтар және ғылыми зерттеу гранттары бар. Тараптар бірлесіп воркшоптар, семинарлар, конференциялар мен оқу іс-шараларын ұйымдастырады. Ынтымақтастық кеңес беру қызметтері, қолданбалы ғылыми зерттеулер және студенттер бастамасымен жүзеге асатын инновациялық жобалар мен идеяларды әзірлеуді қамтиды.
Өз кезегінде Maire компаниясының өңірлік вице-президенті Никколо Хайльперн меморандум NU-мен ынтымақтастықты тереңдететінін және компанияның Қазақстандағы білім, инновациялар мен мүмкіндіктерді дамытуға деген адалдығын растайтынын атап өтті.
«Біз академиялық қауымдастықпен белсенді әрекеттесіп, ішкі құндылықтарды қалыптастыруға үлес қосып, елдің келесі буын инженерлері, зерттеушілері мен жаңашылдарын қолдаймыз», — деді ол.
