NU-дың екі жоғары оқу орнынан кейінгі білім беру мектебінің мемлекеттік саясат және бизнес салаларындағы білім беру бағдарламалары халықаралық аккредитациядан және қайта аккредитациядан өтті.
23 қыркүйекте NU Жоғары мемлекеттік саясат мектебінің (GSPP) мемлекеттік саясат саласындағы докторантура (PhD) бағдарламасы Мемлекеттік басқару саласындағы аккредиттеу жөніндегі Еуропалық қауымдастықтың (EAPAA) халықаралық аккредитациясына алғаш рет ие болды. Сонымен қатар EAPAA «Мемлекеттік саясат магистрі» және «Мемлекеттік басқару магистрі» бағдарламаларын қайта аккредиттеді. Бұл бағдарламалар алғаш рет 2019 жылы аккредиттелген болатын.
EAPAA аккредитациясы білім беру бағдарламаларын жан-жақты бағалауды қамтиды. Оның барысында бағдарламалардың академиялық пәнаралық сипаты, халықаралық құрамдасы және ғылыми зерттеулерге бағдарлануы ескеріледі. Академиялық қауымдастықтан тәуелсіз сарапшылар әр бағдарламаның ерекшеліктері мен стратегиялық мақсаттарын ескере отырып, оларды EAPAA стандарттарымен және жоғары білім сапасын қамтамасыз ету жөніндегі Еуропалық стандарттар мен нұсқаулықтармен салыстыра бағалайды.
2012 жылы құрылғаннан бері Жоғары мемлекеттік саясат мектебі Сингапур Ұлттық университетінің Ли Куан Ю атындағы Мемлекеттік саясат мектебімен стратегиялық серіктестікті дамытып келеді. GSPP мемлекеттік саясат және мемлекеттік басқару салаларында магистратура бағдарламаларын, мемлекеттік саясат бойынша PhD бағдарламасын және Doctor of Public Management бағдарламасын ұсынады.
NU Жоғары бизнес мектебі MBA және Executive MBA бағдарламалары бойынша MBA қауымдастығы (AMBA) және Бизнес түлектері қауымдастығы (BGA) ұйымдарының бес жылдық қайта аккредитациясынан өтті. Бұл шешім AMBA & BGA аккредитациясы жөніндегі Халықаралық консультативтік кеңестің бағалау қорытындысы бойынша қабылданды.
NU Жоғары бизнес мектебі бұл ұйымдардың аккредитациясына алғаш рет 2023 жылы ие болған. Қайта аккредитация нәтижесінде мектеп өзінің халықаралық аккредитациялық мәртебесін сақтап қалды.
«Бұл қайта аккредиттеу — NUGSB-нің ел үшін маңызды әрі әлемге ашық бизнес-мектеп қалыптастыру жолындағы жетістіктерінің нақты бағасы, — деді декан Джозеф Конингс. — Студенттерге жоғары академиялық деңгейде білім беріп, Қазақстанның бизнес қауымдастығын халықаралық тәжірибе мен сараптамаға жақындатып отырған оқытушыларымыз бен қызметкерлерімізді мақтан тұтамыз».
NUGSB-дың халықаралық академиялық ынтымақтастығы Дьюк университетінің Фукуа бизнес мектебімен көп жылдан бері жалғасып келе жатқан стратегиялық серіктестікті, сондай-ақ HKUST бизнес мектебімен кеңейіп келе жатқан ынтымақтастықты қамтиды. Соңғысы аясында Еуразиялық бизнес бойынша бакалавриаттың қос дипломды бағдарламасы жүзеге асырылып келеді. Сонымен қатар мектеп бизнес әкімшілендіру, экономика және қаржы салаларында білім беру бағдарламаларын ұсынады.
NUGSB-дың халықаралық деңгейдегі жетістіктері QS Global MBA Rankings 2027 рейтингі жарияланғаннан кейін тағы да расталды. Рейтингте NU-дың MBA бағдарламасы Орталық Азиядағы толықтай ағылшын тілінде оқытылатын MBA бағдарламалары арасында ең жоғары нәтижеге ие болды.
Аккредитация және қайта аккредитация бойынша қабылданған шешімдер NU-дың білім беру бағдарламаларын халықаралық академиялық стандарттарға сәйкес дамытуға, олардың ғылыми-зерттеу құрамдасын күшейтуге және жетекші шетелдік университеттермен әрі кәсіби ұйымдармен ынтымақтастықты кеңейтуге бағытталған жүйелі жұмысының нәтижесін көрсетеді.
