Nazarbayev University-дің Жоғары бизнес мектебі (NUGSB) 2–6 шілде аралығында Цинхуа университетінің PBC School of Finance мектебі жүзеге асыратын Belt and Road Initiative (BRI) Executive MBA бағдарламасының халықаралық модулін өткізді.
Бағдарлама аясында қатысушылар Қазақстан Республикасының Ғылым және жоғары білім министрі Саясат Нұрбекпен кездесті. Кездесуден кейін министр Қазақстанның әлемнің жетекші университеттерімен ынтымақтастығының стратегиялық маңызын атап өтті.
«Қазақстан үшін Цинхуа университеті сияқты жетекші жоғары оқу орындарымен ынтымақтастық тек академиялық алмасумен шектелмейді. Бұл – ғылыми әлеуетті нығайту, сараптама орталықтарын дамыту, ғылыми әзірлемелерді коммерцияландыруды қолдау және жаңа экономикаға қажетті мамандарды даярлау.
Қазақстандық университеттер мен Цинхуа университеті арасындағы ынтымақтастықтың тереңдеуі студенттерімізге, зерттеушілерімізге және жас ғалымдарымызға жаңа мүмкіндіктер ашады деп сенемін. Ең бастысы, бұл Орталық Азияда өзара ықпалдасқан, бәсекеге қабілетті әрі болашаққа бағдарланған жоғары білім беру экожүйесін қалыптастыруға ықпал етеді».
Бағдарламаның ашылуында NUGSB деканы Йоп Конингс қатысушыларға қош келдіңіз айтып, жаһандану жағдайында көшбасшыларды даярлауда халықаралық академиялық серіктестіктің маңыздылығына тоқталды.
«Executive MBA бағдарламасының қатысушыларын NUде қарсы алуға қуаныштымыз. Осындай халықаралық білім беру модульдері тәжірибе алмасуға, академиялық серіктестікті нығайтуға және бизнес көшбасшыларына Орталық Азияның экономикалық даму ерекшеліктерін тереңірек түсінуге мүмкіндік береді. Өңірдегі жетекші университеттермен және ұйымдармен ынтымақтастығымызды одан әрі кеңейтуді асыға күтеміз», – деді Йоп Конингс.
Бағдарлама «Бір белдеу, бір жол» бастамасына қатысушы елдердің кәсіпкерлері мен жоғары буын басшыларын біріктірді. Қарқынды академиялық модуль халықаралық қаржы, макроэкономика, трансшекаралық бизнес және өңірлік экономикалық ынтымақтастық мәселелеріне арналды. Астанада өткен бағдарлама дәрістермен қатар мемлекеттік органдар мен академиялық қауымдастық өкілдерімен кездесулерді қамтып, қатысушыларға Қазақстанның бизнес ортасы және оның Азия мен Еуропаны байланыстыратын маңызды көпір ретіндегі рөлі туралы жан-жақты түсінік берді.
Академиялық бағдарлама аясында NUGSB оқытушылары дәрістер мен пікірталастар өткізіп, Қазақстандағы іскерлік мәдениет пен нарық ерекшеліктеріне арналған арнайы сессия ұйымдастырды. Сонымен қатар қатысушылар мемлекеттік органдар мен жоғары білім беру ұйымдарының өкілдерімен кездесіп, елдің инновациялық экожүйесімен және өңірлік ынтымақтастық мүмкіндіктерімен танысты.
Халықаралық модульдің NUGSB базасында өткізілуі мектептің басшыларға арналған халықаралық бизнес-білім беруді дамытуға және әлемнің жетекші университеттерімен ұзақ мерзімді серіктестікті нығайтуға деген ұстанымын айқын көрсетеді. Академиялық орта, бизнес және мемлекеттік сектор өкілдерін бір алаңға тоғыстырған бағдарлама «Бір белдеу, бір жол» бастамасы аясындағы халықаралық диалог пен ынтымақтастықты дамытуға, сондай-ақ Қазақстанның өңірлік және жаһандық жоғары білім кеңістігіндегі рөлін күшейтуге ықпал етеді.
