Соңғы жылдары қазақстандық университеттер халықаралық рейтингтерде барған сайын танымал бола бастады. Times Higher Education World University Rankings 2027 рейтингінде Қазақстанның 10 жоғары оқу орны ұсынылған. NU әлемнің үздік 376–400 университеті тобына еніп, ТМД елдерінің жоғары оқу орындары арасында бірінші орынға шықты және Қазақстан мен Орталық Азиядағы көшбасшылық орнын сақтап қалды.
Бұл нәтижелер жалпы елдегі жоғары білім берудің дамуы туралы нені аңғартады? Бұл туралы DKNews басылымына берген сұхбатында Times Higher Education ұйымының жаһандық мәселелер жөніндегі директоры әрі бас операциялық директоры, сондай-ақ World Education Forum (Education World Forum) бас директоры Фил Бейти айтып берді.
Фил Бейтидің айтуынша, NU сияқты жас университеттің рейтингке алғаш енгеннен кейін бірнеше жылдың ішінде әлемнің үздік 400 университетінің қатарына қосылуы — елеулі жетістік. Сарапшы NU-ды қарқынды дамып келе жатқан, әлемге ашық әрі айқын және өршіл мақсаттарға ұмтылатын университет ретінде сипаттады. Сонымен қатар бүгінгі таңда университеттердің халықаралық бәсекеге қабілеттілігі инфрақұрылыммен ғана өлшенбейді. Зерттеу сапасы, талантты мамандарды тарту мүмкіндігі және жаһандық академиялық кеңістікке ашықтық барған сайын маңызды бола түсуде.
THE өкілінің пікірінше, осы тұрғыдан алғанда NU Қазақстанның жоғары білім беру жүйесіндегі жетекші университеттердің біріне айналып келеді. Сонымен бірге ел бойынша қол жеткізілген жалпы нәтижелер де маңызды: рейтингке алғаш рет енген университеттер саны бұрын-соңды болмаған деңгейге жетіп, өткен жылмен салыстырғанда екі есе өсті. Бұл зерттеу әлеуетінің кеңейіп, тұтастай алғанда университеттер жүйесінің дамып келе жатқанын көрсетеді.
NU мен Қазақстанның басқа да университеттерінің жетістіктері Қазақстан Президенті Қасым-Жомарт Тоқаев айқындаған бағытқа сәйкес келеді. Бұл — сапалы оқытуды, ғылыми зерттеулерді, білім трансферін және халықаралық ынтымақтастықты қамтитын жоғары білім беруді кешенді дамыту. THE өкілінің айтуынша, дәл осы бағыттардың үйлесуі адами капиталды дамытуға және білім экономикасына көшуге үлес қоса алатын қуатты университеттер жүйесін қалыптастыруға ықпал етеді.
Халықаралық рейтингтердегі ілгерілеу университеттердің беделімен ғана байланысты емес. Оның артында нақты зерттеу көрсеткіштері, халықаралық тартымдылық және академиялық ынтымақтастық мүмкіндіктерінің кеңеюі тұр. Сарапшының пікірінше, Қазақстан Президенті айқындаған стратегия халықаралық рейтингтердегі көрсеткіштерден көрініс таба бастады.
Алдағы уақытта одан әрі ілгерілеу халықаралық ғылыми ынтымақтастықты нығайтуға және қазақстандық ғалымдардың жаһандық ғылыми жобаларға белсендірек қатысуына да байланысты болады.
