Nazarbayev University студенттік оркестрі (NU Orchestra) Қазақстанның симфониялық музыка тарихында жаңа жарқын бетті ашты. Шығармашылық ұжым алғаш рет университет қабырғасынан шығып, Ғылым қызметкерлері күніне орай елорданың басты сахналарының бірі – Бейбітшілік және келісім сарайында ауқымды жеке концерт ұйымдастырды. Іс-шара көрермендердің үлкен қызығушылығын тудырып, 1500 адамды жинап, толық аншлагпен өтті.
«Around the World» («Дүниежүзілік саяхат») деп аталатын концерттік бағдарлама екі сағатқа созылып, нағыз музыкалық сапарға айналды. Бұл кеште әлемнің 13 елінің мәдениетін паш ететін 24 туынды орындалды. Репертуар ұлттық мұра мен әлемдік трендтерді үйлесімді біріктірді: сахнада дәстүрлі қазақ күйлері мен халық әндерімен қатар, шетелдік поп-хиттер мен танымал саундтректердің аспаптық каверлері шырқалды.
Аспаптардың бірегей құрамы өнер көрсетуге ерекше реңк берді. Бір сахнада домбыра, шертер, қобыз, сыбызғы және жетіген сияқты қазақтың ұлттық аспаптары, сондай-ақ скрипка, виолончель, флейта, саксофон, фортепиано, электро және бас гитаралар, барабандар мен түрлі перкуссияны қамтитын классикалық және заманауи аспаптар үйлесім тапты.
Кешке қатысқан университеттің академиялық басшылығы да атқарылған жұмыстың ауқымын жоғары бағалады. NU Президенті, профессор Вакар Ахмад білім алушылардың жан-жақты дамуының маңыздылығын атап өтті: «Кәсібилік деңгейі таңғаларлық. Егер сахнада студенттік оркестр өнер көрсетіп жатқанын білмесек, оны ажырату мүмкін емес еді. Мен біздің студенттерімізбен шексіз мақтанамын. Олар инженер және ғалым бола тұра, сонымен бірге тамаша музыкант әрі әртіс бола алады. Кәсіби ортада біз қолданатын көптеген дағдылар — уақытты басқару, командада жұмыс істеу, көшбасшылықты өз мойнына алу — дәл осы оқу аудиторияларынан тыс жерде қалыптасады».
NU Orchestra клубының президенті Арсен Елтай студенттік ұйымның университет қабырғасынан тыс жерде мың жарым көрерменді қалай жинай алғанының құпиясымен бөлісті: «Бұның артында үлкен командалық жұмыс тұр: мықты тұжырымдама, сапалы визуал, әлеуметтік желілердегі белсенді ілгерілету және түлектеріміз бен серіктестеріміздің қолдауы. Концерт өз көрерменін табады деп сендік, бірақ 1500 адам жиналып, толық аншлаг болуы біз үшін де өте қуатты әрі шабыттандыратын нәтиже болды».
Тәжірибелі студенттердің жыл сайын оқу бітіріп, олардың орнына жаңалардың келуіне қарамастан, оркестрдің көптеген жылдар бойы кәсібиліктің осындай жоғары деңгейін қалай сақтап келе жатқаны туралы сұраққа жауап бере отырып, Арсен Елтай ішкі дәстүрлердің маңыздылығын ерекше атап өтті: «Менің ойымша, біздің басты күшіміз – адамдарда және жылдан жылға беріліп келе жатқан мәдениетте. Иә, жыл сайын мықты музыканттар оқу бітіреді, бірінші курс студенттері келеді, бірақ бізде тәлімгерлік жүйесі өте жақсы жұмыс істейді: жоғары курс студенттері жаңадан келгендерді оркестрге қосып, оларға тек музыкалық жағынан ғана емес, сонымен бірге клубтың рухын сезінуге көмектеседі. Осының арқасында біздің дыбысталу деңгейіміз бен іске деген көзқарасымыз сақталады. Ең құндысы — көптеген түлектер университетті бітіргеннен кейін жоғалып кетпей, көмектесуін жалғастырады: концерттерге келеді, кеңес береді, кейде тіпті жобаларға қайта оралады. Міне, осы нәрсе сабақтастықты қалыптастырады».
Оркестрдің Бейбітшілік және келісім сарайының сахнасындағы сәтті дебюті NU студенттік бастамаларының жаңа сапалы деңгейге көтерілгенін, амбициялық жобалардың кәсіби деңгейде жүзеге асып жатқанын дәлелдеді. NU Orchestra студенттердің буынын музыкаға деген сүйіспеншілікпен біріктіріп, университеттің шығармашылық энергиясының символы болып қала береді.
