Телеграфтан жасанды интеллектке дейін: БҰҰ телеком жетекшісі NU-де дәріс оқыды
Nazarbayev University (NU) Халықаралық электр байланысы одағының (ХЭБО) Бас хатшысы Дорин Богдан-Мартинді қабылдап, цифрлық дәуірдің сын-қатерлері мен мүмкіндіктеріне арналған дәріс өткізді. ХЭБО – ақпараттық-коммуникациялық технологиялар саласындағы БҰҰ-ның мамандандырылған агенттігі және ең көне халықаралық ұйымдардың бірі. Оның тарихы 1865 жылдан бастау алады: сол жылы Парижде 20 еуропалық мемлекет Халықаралық телеграф конвенциясына қол қойып, Халықаралық телеграф одағын құрды. Өз сөзінде Бас хатшы ұйымның миссиясын түсіндіріп, қазіргі жаһандық сын-қатерлерді атап өтіп, оларды өзінің кәсіби жолымен байланыстырды.
Іс-шараны ашқан Дорин Богдан-Мартин былай деді: «Мен қызығушылық таныттым, және сол қызығушылығым менің кәсібіме айналды — коммуникацияларға және олардың әлеуетіне деген құштарлығым. Бұл саланың ерекшелігі – оның ешқашан тоқтап тұрмайтынында. Мен мансабымды бастаған кезде басты назар мобильді телефондарға аударылған еді, кейін барлығына интернетке қол жеткізуді қамтамасыз ету міндеті тұрды. Бүгінде басты тақырып — жасанды интеллект. Бірақ біз үшін ХЭБО-да басты миссия әрқашан байланысты қамтамасыз ету болып қала береді».
Бас хатшы әлем халқының үштен бірі – 2,6 миллиард адамның әлі де интернетке қосылмағанын ерекше атап өтті. Оларды 2030 жылға дейін қосу үшін шамамен 2,8 триллион доллар көлемінде инфрақұрылымға және құзыреттерді дамытуға инвестиция қажет. Сондай-ақ ол цифрлық дағдылардың, жергілікті тілдердегі қосымшалардың және сенімді киберқауіпсіздік шараларының маңыздылығын атап өтті.
Дәрістің тағы бір тақырыбы — ғарыштың тұрақты пайдаланылуы. Қазіргі уақытта байланыс спутниктерінің саны 10 000-нан асып кетті, ал 2030 жылға дейін ондаған мың жаңа өтінім күтілуде. Орбиталық ресурстарды және ғарыш қоқысын тиімді басқару болашақ ұрпақ үшін ғарышты қауіпсіз әрі қолжетімді сақтауда шешуші рөл атқарады.
Богдан-Мартин сондай-ақ 2017 жылы AlphaGo бағдарламасының ежелгі го ойынында әлем чемпионын тарихи жеңісінен кейін ХЭБО бастаған AI for Good саммиті туралы айтты. Бүгінде ол БҰҰ-ның жасанды интеллекттің Тұрақты даму мақсаттарына қосатын үлесін талқылауға арналған жетекші алаңына айналды, әрі ЖИ басқару мәселелері бойынша жаһандық диалогтың орталық платформасы болып отыр. Келесі жылы ХЭБО БҰҰ-ның жасанды интеллектті басқару жөніндегі алғашқы жаһандық диалогында және тәуелсіз сарапшылардың ғылыми панелін құруда маңызды рөл атқарады.
Дәрістен кейін жасанды интеллект, мемлекеттік саясат, инженерия және білім беру сияқты әртүрлі салалардан келген қатысушылар ЖИ-дің мүмкіндіктері мен қиындықтарын тереңірек талқылады.
Халықаралық электр байланысы одағы (ХЭБО) 1865 жылы Парижде 20 еуропалық ел қол қойған Халықаралық телеграф конвенциясы негізінде құрылды. Ол трансшекаралық телеграф байланысының ортақ стандарттарын орнатуға бағытталған еді. Уақыт өте келе Халықаралық телеграф одағы бүгінгі ХЭБО-ға айналды — құрамында 194 мүше мемлекеті бар БҰҰ-ның мамандандырылған агенттігі. Ұйым телеграф стандарттарын бекітуден бастап интернет, ғарыш және жасанды интеллект салаларында жаһандық ережелерді қалыптастыруға дейін дамыды, бірақ оның басты миссиясы — халықаралық ынтымақтастық пен үйлесімділік арқылы байланысты қамтамасыз ету — өзектілігін ешқашан жоғалтқан емес. Биыл ХЭБО өзінің 160 жылдығын, ал БҰҰ 80 жылдығын атап өтуде.
Іс-шараны NU-дың Интернационализация департаменті ұйымдастырды. Бұл университеттің ғылым, технология және тұрақты даму салаларындағы жаһандық диалогты дамытуға бейілділігін көрсетеді.
