Nazarbayev University ұсынған екі зерттеу бастамасы Times Higher Education (THE) Asia Awards 2026 сыйлығының қысқа тізіміне еніп, жаратылыстану-техникалық ғылымдар (STEM) мен әлеуметтік ғылымдар салаларындағы жоғары жетістіктері үшін мойындалды. Бұл марапат Азияның сан қырлы жоғары білім кеңістігіндегі көшбасшылықты, жаңашылдықты және институционалдық ықпалды дәріптейді.
«Жылдың үздік зерттеу жобасы: STEM» номинациясы бойынша NU жетекшілік еткен жоба экологиялық таза энергия мен ғарыш технологияларын дамытуға қосқан үлесі үшін іріктелді. Профессор Жұмабай Бәкенов, доктор Батухан Татықаев, доктор Дәурен Батырбекұлы, сондай-ақ 10-нан астам зерттеуші мен магистранттардан құралған пәнаралық команда ғарыш жағдайына ұқсас ортада жұмыс істеуге қабілетті, авиация-ғарыш деңгейіндегі литий-ионды аккумуляторлар әзірледі. Бұл жоба Қазақстанның жер серіктері мен стратосфералық ұшқышсыз аппараттарды отандық энергия көздерімен қамтамасыз ету жолындағы алғашқы қадамы саналады.
NU-дың екінші жобасы «Жылдың үздік зерттеу жобасы: өнер, гуманитарлық және әлеуметтік ғылымдар» санатында қысқа тізімге енді. NU-дың Кәсіпкерлікті зерттеу ғылыми-зерттеу орталығының (NURCE) жетекшісі, профессор Шумайла Юсуфзай басқаратын жобасы кәсіпкерлікті тек экономикалық қызмет емес, мәдени әрі әлеуметтік құбылыс ретінде зерделейді.
2022–2025 жылдар аралығында зерттеу тобы Орталық Азия елдерінде кәсіпкерлермен бірлесіп, негізгі дискурста жиі елеусіз қалатын дауыстарды алға шығаратын тоғыз баяндау сипатындағы кітап жарыққа шығарды. Солардың ішінде Tamyr Reflections: Qazaqstan-дағы мұра мен кәсіпкерлік туралы 33 хикая атты басты еңбек жаңашылдық, дәстүр және болмыс тақырыптарын тоғыстырады. Жоба аясында қоғамдық көрмелер, визуалды этнография элементтері іске асырылып, сондай-ақ қазақ ойшылы Абай Құнанбайұлының «толық адам» тұжырымдамасына негізделген «Tolyk Adam» атты оқу бағдарламасы әзірленді.
THE Asia Awards 2026 жеңімпаздары 22 сәуірде Гонконгта, THE Asia Summit аясында жарияланады. Саммит барысында университет басшылары Азияның жаһандық инновациядағы рөлі мен жоғары білімнің болашақты қалыптастырудағы жауапкершілігін талқылайды.
