Nazarbayev University ғалымдарының зерттеуі университеттердің ғылыми қызметін бағалау тәсілдеріне қатысты халықаралық талқылауға қосқан үлесі үшін University World News басылымында жарияланды.
Алексей Ремизов, Сәуле Садықова және профессор Шазим Али Мемонның Is field-weighted citation impact fit for purpose? Sensitivity, structural bias, and implications for global university rankings атты мақаласы жуырда Scientometrics ғылыми журналында жарық көрді.
Зерттеуде халықаралық рейтингтерде, соның ішінде Times Higher Education World University Rankings рейтингінде қолданылатын Field-Weighted Citation Impact (FWCI) көрсеткіші талданды. Бұл көрсеткіш университет жарияланымдарының белгілі бір ғылыми саладағы әлемдік орташа деңгеймен салыстырғанда қаншалықты жиі дәйексөзге алынатынын бағалайды.
Зерттеу барысында әлемнің жетекші университеттеріне тиесілі 230 мыңнан астам ғылыми жарияланымға талдау жасалды. Нәтижесінде FWCI көрсеткішіне зерттеу сапасынан бөлек, жарияланым түрі, ғылыми салаларды жіктеу тәсілі, ашық қолжетімді жариялау саясаты және ірі халықаралық ғылыми ынтымақтастық сияқты факторлардың да ықпал етуі мүмкін екені анықталды.
Зерттеу нәтижелері Times Higher Education World University Subject Rankings 2025 рейтингіне енген 100 университеттің деректері арқылы да расталды. Бұл анықталған заңдылықтардың жекелеген оқу орындарына ғана тән емес, кең ауқымда байқалатын үрдіс екенін көрсетті.
Зерттеу авторлары FWCI көрсеткішінің сенімділігі мен түсіндірілуін жақсартуға мүмкіндік беретін бірқатар әдістемелік ұсыныстар да ұсынды.
Бұл еңбек университеттердің ғылыми жетістіктерін бағалау тәсілдерін жетілдіруге арналған халықаралық ғылыми пікірталасқа маңызды үлес қосып, зерттеу нәтижелерін бағалауда әділ әрі ашық тәсілдерді қолданудың маңызын тағы бір мәрте көрсетті.
