22 шілде 2025
Осы мақаламен бөлісіңізNazarbayev University-дің үш студенті өңірдегі ең беделді кәсіпкерлік буткэмптердің бірі — Гонконг ғылым және технология университеті ұйымдастырған HKUST Entrepreneurship Bootcamp бағдарламасына қатысып, қарқынды оқудан өтті.
Бұл бағдарламаға NU-ды қоса алғанда, Азия университеттері альянсының 14 жетекші оқу орнынан 80-нен астам студент пен жас маман жиналды.
6–12 шілде аралығында Жаратылыстану, әлеуметтік және гуманитарлық ғылымдар мектебінің студенті Диана Бекешова, сондай-ақ Жоғары бизнес мектебінің студенттері Нұрсұлтан Сауқымов пен Сымбат Ғазиз стартап идеясынан бастап оның прототипін жасауға дейінгі жолдан өтіп, шынайы бизнес ортада жұмыс істеудің негіздерін үйренді.
— Бұл бағдарлама тек стартап туралы емес, ойлау жүйесі жайлы болды. Біз кәсіпкерлер мен менторлар өткізген мазмұнды воркшоптардан өтіп, нарықты зерттеуді, прототип жасауды және өз жобамызды сенімді таныстыруды үйрендік. Ең бастысы — идеямыздың шын мәнінде өнімге айнала алатынын түсіндік. Бұл өте шабыттандырады, — деді Диана Бекешова.
Оқу процесінен бөлек, қатысушылар Азиядағы ең ірі инновациялық хабтардың біріндегі ерекше атмосфераны сезінді. Бағдарламаның шарықтау шегі — Виктория шығанағындағы желкенді кемеде өткен нетворкинг-кешкі ас болды. Онда студенттер венчурлық инвесторлармен, стартап негізін қалаушылармен және экожүйе көшбасшыларымен танысты.
— Бізге ең қатты әсер еткені — LU Jockey Club Gerontech X Lab зертханасына бару болды. Онда егде жастағы адамдардың өмірін жеңілдететін технологияларды — ақылды орындықтар мен қозғалу құрылғыларынан бастап, тепе-теңдікті сақтайтын құралдарға дейін — көзімізбен көрдік. Бұл бізге нағыз инновация тек технология емес, ол — жанашырлық пен шынайы өмірге арналған шешім екенін еске салды, — дейді Нұрсұлтан Сауқымов.
Asian Universities Alliance (AUA) — академиялық серіктестікті, білім алмасуды және бірлескен зерттеулерді дамыту мақсатында 2017 жылы құрылған Азияның жетекші университеттерінің альянсы. Nazarbayev University — AUA-ның тең құрылтайшысы және Tsinghua University, National University of Singapore мен Hong Kong University of Science and Technology сынды 15 серіктес университетпен тығыз жұмыс істейді.
