27 қыркүйек 2025
Осы мақаламен бөлісіңізOpen House Day: 18 мың адам келді және жаңа гранттар жарияланды
Nazarbayev University (NU) әлеуметтік тұрғыдан осал санаттағы ауыл мектептерінің оқушыларына арнайы гранттар бөлді. Бұл туралы 27 қыркүйекте өткен “NU Fest: Knowledge Race” Ашық есік күні аясында белгілі болды. Шараға 18 мың адам – ата-аналар, мектеп оқушылары, студенттер және заманауи білімге қызығушылық танытқан жандар қатысты.
Келушілер университетке қабылдау ережелерімен танысып, NU-дың жаңа бағдарламалары туралы ақпарат алды, профессорлармен және түлектермен жүздесті, заманауи зертханаларды, FabLab, TechnoPark пен стартап-орталықтарды аралады, сынамалық дәрістер мен экскурсияларға қатысты. Сондай-ақ кәсіби бағдар беру мамандарына сұрақтарын қою мүмкіндігі болды. Қанық бағдарламадағы ең тартымды сәттердің бірі – шынайы Formula 1 болидінің көрсетілімі болды.
Бүгінде NU – инженерия, жаратылыстану және гуманитарлық ғылымдар, медицина, бизнес, білім беру және мемлекеттік саясат салаларын қамтитын сегіз мектеп пен шамамен 8 000 студенті бар жетекші жоғары оқу орны. Университет түлектерінің 98%-ы жұмысқа орналасқан, олардың көбі Қазақстанда қызмет етеді. Университет президенті қонақтарды қарсы алып, оқу орнының жетістіктері мен мүмкіндіктері туралы айтты.
«Біздің университетке түсу оңай емес, бірақ осының арқасында ашылатын мүмкіндіктердің құны да жоғары. Биыл NU-ға 10 мыңнан астам өтініш түсіп, олардың шамамен 3 мыңына қабылдау берілді. Мемлекеттік гранттар саны шектеулі болғанымен, іріктеуден өткен талапкерлерді ақылы бөлімге қабылдауға да әзірміз. Сондай-ақ жаңа жобаларды іске асырудамыз - Лондон университетінің Шығыстану және африка зерттеулері мектебімен (SOAS) бірлескен жаһандық қатынастар мен еуразиялық зерттеулер бойынша магистратура және Гонконг ғылым және технология университетімен бірлескен кәсіпкерлік бойынша қос дипломды бакалавриат. Алдағы уақытта бұл бастаманы жаратылыстану, информатика, инженерия және медицина бағыттарындағы бағдарламалармен кеңейтуді жоспарлап отырмыз», - деді NU президенті профессор Вакар Ахмад.
Қазақстанда және одан тыс жерлерде NU-ға деген қызығушылықтың өсуі халықаралық мойындаудың артуымен де байланысты. Times Higher Education (THE) рейтингі бойынша университет әлемдегі ең үздік ЖОО-лардың 24%-ның қатарына енсе, оның Жоғары білім беру мектебі үздік 200-дің ішінде. Осы беделдің арқасында университетке шетелдік талапкерлер де көптеп келуде: биыл Қытай, Ресей және АҚШ қоса алғанда 44 елден жүздеген өтініш түсті.
