16 қазан 2025
Осы мақаламен бөлісіңізХалықаралық стандарттардың болашағы NU жанында талқыланды
Nazarbayev University (NU)) Халықаралық стандарттау ұйымының (ISO) Бас хатшысы мырза Серхио Мухика «Халықаралық стандарттардың қазіргі әлемдегі рөлі және олардың дамуының жаңа үрдістері» тақырыбында қонақ дәрісін оқыды.
Іс-шара Қазақстан стандарттау және метрология институтымен (ҚазСтандарт) бірлесе ұйымдастырылып, жоғары оқу орындарының өкілдерін, мемлекеттік органдар мен академиялық қауымдастық мүшелерін біріктірді. Дәріс студенттер, оқытушылар және мамандар үшін стандарттау жүйесінің жаһандық құрылымын және оның технологиялық прогресс пен тұрақты даму үрдістеріне әсерін терең түсінуге мүмкіндік берді.
Қошемет сөзінде ҚазСтандарттың бас директоры Малик Саулебай бұл сапардың Қазақстанның халықаралық стандарттау үдерістеріне белсенді қатысуының дәлелі екенін атап өтті:
«ISO Бас хатшысын алғаш рет Қазақстанда қарсы алу – біз үшін үлкен құрмет. Бұл сапар ұлттық стандарттау жүйеміздің халықаралық деңгейде мойындалғанын және Қазақстанның осы саладағы жаһандық бастамаларға белсенді қатысып отырғанын көрсетеді», — деді ол.
Өз баяндамасында мырза Мухика ISO стандарттарының эволюциясы мен олардың әлемдік индустрияларда қауіпсіздік, инновация және сапаны қамтамасыз етудегі рөліне тоқталды. Сондай-ақ ол стандарттау саласындағы жаңа үрдістерді – цифрлық трансформацияны, тұрақтылықты және этикалық басқаруды атап өтті.
Дәрістен кейін студенттер мен зерттеушілер халықаралық стандарттарды ұлттық деңгейде қолданудың қиындықтары мен мүмкіндіктерін талқылаған сұрақ-жауап сессиясы өтті. Іс-шара ISO тақырыбына арналған студенттік қысқаша таныстырылымдармен аяқталды.
ISO – стандарттау бойынша 165 мүше елді біріктіретін әлемдегі жетекші халықаралық ұйым. Серхио Мухика мырза 2017 жылдан бері ISO Бас хатшысы қызметін атқарып, ұйымның жаһандық ынтымақтастық пен инновацияны ортақ стандарттар арқылы дамыту жөніндегі жұмысына басшылық етеді.
Бұл сапар Қазақстан мен ISO арасындағы ынтымақтастықты нығайтудағы маңызды кезең болып табылады және Назарбаев Университетінің халықаралық үздік тәжірибе мен инновациялар жөніндегі диалог алаңы ретіндегі рөлін айқындай түсті.
